баруун этгээдэд зорчсон тэмдэглэл

Хөдөө сайхан байлаа. Айраг уусан шигээ голын хөвөөнд шумууланд хазуулаад хэвтээд л сайхан байна лээ. Баянхонгорт очиж хэд хонохдоо нэг зүйлийн талаар үнэхээр гайхлаа. Уул нь миний төрсөн нутаг л даа. Ойрын хэдэн жил очоогүй болоод ч тэрүү сэтгэлд нэг л дотно сайхан байсан. Тэндэхийн залуусын уур амьсгалыг мэдрэхээр нэг орой  хамт явсан залуугаа уруу татаад гараад алхлаа даа. Оройн 22 цаг дөхөж байсан болохоор гадаа харанхуй, гудамж нь гэрэлгүй, айлуудын цонхоор гялайх гэрлүүд л хотыг гэрэлтүүлж байлаа. Ашгүй нэг 22.00 цагт гудамжны гэрлүүд нь асч одоо л нэг шөнийн амьдрал нь эхэлж байна гэж бодлоо. Энд тэнд яаралгүй алхах хүмүүс. Төв зам дээр нь УБ-ын "Төв шуудан"-ийн урд зам дээр байдаг шиг урсдаг гэрлэн самбар дээр нь "shalgaj baina. Ajillaachee t1 mini" гэсэн бичиг харин нэг хайнга урсаж байнаа. Дахин дахин шүү. Хэн нэгэнд л уурласан бололтой догоо тэр ажиллуулж багаа хүн нь.
За тэр ч яахав гол зүйлдээ орье. Ганц нэг хүн гайгүй хэлж байсан Соёмбо хэмээх нэртэй газар замын хажууханд байсан болохоор тийшээ орохоор алхлаа. Орон нутагт "метро", "масс" мэтийн нэг их том клаб байх биш хэдэн жижиг баар ажилладаг хойно. Хоёул хаалгаар ороод захдуухан ширээнд суугаад ширээгээ ямар хоосон байлгалтай биш үндэснийхээ үйлдвэрийн ганц нэг бор шилтэй  юм, импортоор орж ирдэг улаан ус захиалаад суулаа даа. Хөгжим хэмнэлээ мэдрүүлэн чанга дуугарч амаралтаараа очсон бололтой оюутнууд хөгжимтэй хэмнэл нийлүүлэн бүжиглэж байлаа. Би ч бүжиг энэ тэрд маруухан болохоор даруухан зан гаргаж доороо хөдөлж зогссон л доо. Удалгүй шөнийн 00,00 цаг дөхөж байтал 2 цагдаа орж ирээд хөгжимний дууг нь султгуулаа. УБ-т ч гэсэн адилхан дөө. Цагдаа орж ирээд л загнаж гардаг хойно. Гарахаар зэхэж байх зуур нэг цагдаа нь бидэн дээр ирээд "Одоо хаах ёстой. эндээс түргэн гар" хэмээн омогдож гардаг юм байна. Угийн хэг ёг хийх дуртай болохоороо яагаад гэсэн сониуч асуулт асуутал харин гайхмаар хариулт өгдөг юм байна. "Бүх баар цэнгээний газруудыг шөнийн 00.00 цагт хааж, архи согтууруулах ундаагаар үйлчлэхгүй байх ХУУЛЬТАЙ" хэмээн өнөөх цагдаа хээв нэг хариуллаа. Хаанаас гарч ирсэн хуулийн талаар асуутал "Дээрээс тушаасан. Элдэв юм яриад байвал саатуулна шүү" гэснээр бидний яриа өндөрлөсөн юм. тэндээс гарахад өнөөх гудамжны гэрлүүд хэдийнээ унтарсан байлаа.Цагаа хартал 00.20 цаг...
Дараа нь хүнээс асуухнээ нөгөө нийслэлд үйлчилдэг захирамжийг хэлж байсан гэж хариуллаа. Нийслэлд үйлчлэх хэм хэмжээ нийслэлдээ л үйлчилмээр байтал хаа холын 600 км-ын цаана үйлчлэхийг хараад гайхаж билээ. Баянхонгор бол МУ-ын нийслэл байна гэсэн заалт би лав Үндсэн хуулийс хайгаад олоогүй юм даа.

21:28 - 2010-11-30 - Сэтгэгдэл бичих